Chapter Text
話說最近皮皮突然好想去學拉丁舞，原因其實都幾簡單，因為佢有次係舞蹈教室見到一個頭髮長長有丁丁混血味道嘅男仔。佢走左去八其他啲同學，知道嗰個男仔叫Tiger，學緊拉丁舞，所以佢就想去學一下。好彩舞蹈教室有得試左一堂先決定上唔上落去，因此皮皮決定睇定啲先去課金。追男仔還追男仔但駛錢都係要睇定啲嘅。
唔多好彩嘅皮皮都上左三節唔同老師嘅拉丁班，先遇到Tiger㗎。當佢遇上Tiger之後，先發現原來Tiger唔係學生，而係個導師請返黎嘅一個助教。啲班上嘅同學都以阿姨輩為主，所以佢地見到另一個美少年（？）皮皮都用盡力走說服佢留係呢班度。
啲同學都七咁八舌咁同皮皮講呢班個導師有幾好，班上嘅同學有幾和諧咁。但對皮皮黎嘅，最重要嘅，係佢知道左Tiger會教呢一班。皮皮見到Tiger fullset 咁去上堂，黑色，緊身，閃片，開胸，就係呢set野都已經值得皮皮去課金。
當然Tiger只係助教係有原因嘅，佢真心唔太鍾意講野，特別係喺啲唔太熟人面前，所以做助教嘅佢大部分時間只需要做示範就好。
當Tiger今日見到有一個新同學，佢有少少驚訝。嗰新同學仲要係一個後生嘅男同學，雖然個同學未有拉丁標準裝備，但黑色緊身恤衫加闊腳西褲，都睇得出個新男同學身型好唔錯，好適合跳拉丁舞。
課堂開始由導師開始個課堂，Tiger係旁邊準備好今日要示範嘅動作，而佢好多小動作都被皮皮看在眼裡。皮皮可以睇到Tiger嘅不自在。到Tiger出黎示範今堂要做嘅動作，導師係一邊解釋。真心皮皮其實冇乜聽到導師講乜野，佢只係覺得Tiger扭得好好睇，剛柔並重，而且Tiger條腰線好Firm，應該會係一個好腰好腎好男人。
當然專心示範嘅Tiger冇諗過會有人係佢做緊示範嘅時候會有人意淫佢，而且意淫佢嘅係一個男仔（人）。
啲女同學已經上左好多堂，所以基本功都算紮實。唯獨呢個新嘅男同學，睇得出佢應該學過下其他舞，但拉丁應該係新手。導師為左keep住個新學生就派左Tiger同個皮皮一對一“你好，我係Tiger,係呢度助教。”Tiger先介紹左自己先。
“哦，我叫Frankie,你可以叫我做皮皮。”
“好啊，Frankie。我地開始啦！”Tiger唔明點解呢個男同學要介紹兩個名。“我地由基本踏步開始，你睇我做一次。”
皮皮冇諗過Tiger會咁寡言，明明佢年紀咁輕同埋佢示範嗰時眼中有光嘅喎，應該要係活力四射㗎。明顯皮皮冇留心聽Tiger嘅講解，所以到Tiger要佢試嘅時候，都係手唔係手，腳唔係腳咁啦。
Tiger突然覺得原來呢個叫Frankie嘅新同學上手都幾慢。為左令佢會留係呢班，Tiger決定出手，係真係出手guide住Frankie咁做。有人用手帶住咁跳，Frankie當然上手會快啲。係個半鐘之後，導師黎睇下皮皮嘅成果。“Frankie同學，你都學得幾好喎，不如跟我地學多一期試下啦。”
“嗯...我諗一下啦！”皮皮冇答實。
導師同Tiger打左個眼式“哦，好啊！Frankie同學你再諗一下啦！”就行開左。
Tiger當然收工老細嘅指令要佢留住個同學啦！但點留先？
“Er...Frankie,你做得咁錯啊！”Tiger堅唔習慣開一個話題。
“係咩？”皮皮俾Tiger稱讚，有啲開心“咁我適唔適合繼續學？”
Tiger點點頭，多一個學生佢有多啲人工。
“咁會唔會係繼續你教先？”皮皮繼續問“男導師好似冇咁尷尬。”係阿Tiger個老細係一個女人。
“嗯～”Tiger繼續點點頭表示佢會繼續教皮皮。
當然落堂之後，皮皮二話不說就去左交一期學費啦。
Tiger換完衫出黎就被老細叫左入房講黎緊安排。“啲阿姨好開心今日班上面多左個男仔，你就盡keep住阿Frankie係呢班啦！ok?”
“哦”Tiger唔明啲女同學嘅目的，但有錢賺有舞跳就是但啦。
老細都咁叫Tiger囉，所以Tiger就好專心咁每次上堂都同皮皮一對一咁上。當然皮皮都好開心啦，上堂有時可以扮唔識俾Tiger摸下腰，捉下手咁跳舞，簡直滿足左佢一部份嘅幻想。
直到上左四，五堂之黎，皮皮借啲意問Tiger拎電話，等Tiger方便分享啲拉丁教學影片俾自己學習。
Tiger當然不疑有他，而且上左幾堂之後,Tiger都覺得Frankie性格幾好，個人好易話為。而且Frankie唔止身型好拉丁，個樣都好標緻，近睇冇毛孔，遠睇零死角。
“好...抬腿...”Tiger同皮皮講。
不過經過左幾次嘅練習，皮皮同Tiger比之前係熟絡左嘅，所以皮皮都覺得Tiger開始講多左野。
“係...腰要扭多少少。”當然都係同上堂相關比較多。
Tiger都發現Frankie其實上手冇想像咁慢，而且個人都幾Charm。
導師偶然都會過黎關心一下呢個新同學。“Frankie,你真係上左手囉喎”
“係missy你教得好啫！”皮皮明白要令Tiger好做人嘅重要性。
“不如你都參加下呢個比賽啦！”導師拎出左一個業餘拉丁舞比賽嘅報名表。導師心諗多幾個人先搞得成，有殺錯，冇放過!
“吓？我學左冇幾耐!”但其實皮皮心諗‘機會黎啦！飛雲’
“你資質咁高,handle到嘅。”導師繼續Hard sell“唔係就搵Tiger加啲鐘囉。”
“吓，咁未好麻煩囉！”但皮皮心中OS‘yes!就等你呢一句。’
“唔會啦，你同Tiger夾下時間啦！”導師見自己任務快要完成，啲手尾就留俾Tiger自己搞啦！
當個導師行開左之後，皮皮有啲唔好意思“吓，會唔會太麻煩你。”
“唔會...但都要搵返partner”Tiger提議。“畢竟兩個人要夾下先可以去參加比賽。”
“咁我留意下啦！”皮皮答‘搵Partner就笨啦！’
當然鐘係有冇報名都係要加左先啦。舞室裡面只係Tiger同皮皮兩個。
“Ok,Frankie”Tiger一如以往咁認真。“我幫你揀左隻舞。你仲未有Partner我就頂住先。”
“好啊，麻煩你啦！”皮皮誠懇咁答。
“咁我做住個女仔先。”做開助教嘅Tiger男女舞步都ok。“Frankie,你坐係張櫈度先。”
“哦..好啊”皮皮跟Tiger嘅指示“咁駛唔駛坐得拉丁一啲？”皮皮一係轉身擺手華麗坐低。
“Er…都可以嘅”Tiger被Frankie嘅氣勢嚇左一下。“咁之後個女舞伴就會慢慢行過黎。”
Tiger一步一步由皮皮張櫈後面行埋皮皮身邊，一抬腳就將自己隻腳輕輕放左係皮皮嘅大脾上面。
“Frankie,你要望住個Partner,而個partner都會望住你。”Tiger繼續專心講解。“個女步都係希望引起你嘅注意。”
“哦”皮皮心諗‘我夠想引起你注意啦！’
Tiger將手伸到皮皮面前俾皮皮拉住自己起身。
過幾個基本過度舞步之後，Tiger表示會有一個新嘅抬舉舞步俾皮皮試下。
“嗯，好簡單。”Tiger邊跳邊講解“你只需要用力承住個女伴轉一個圈就可以。”
“我唔係好明”跳舞都係唔係可以就咁講“不如Tiger你示範一下啦！”
“哦...好啊”Tiger同皮皮換左位置“你用力係我手上面伸直手臂撐起自己就得。”
但當Tiger真夠近皮皮身後，皮皮伸出雙手到Tiger對手上面嘅時候，皮皮覺得自己腰後有野頂住，佢都覺得Tiger突然成個人都硬著軚。佢由鏡度見到Tiger面上有啲唔正常嘅紅光。
皮皮心諗，Tiger今次仲走得乜?!“嗯，有啲野頂住我條腰，Tiger你冇野丫麻？”
“er…冇啊！不如我地先休息一下！”Tiger要啲冷靜嘅時間。“Frankie,我諗你都真係要個女舞伴。不如我搵missy幫你搵一個。”
“唔駛麻煩missy住先啦！”皮皮真摯咁答“我自己再搵一下。”
當然Tiger係皮皮未搵到舞伴之前，都繼續幫皮皮練舞同排舞。
過左幾堂之後，皮皮覺得係時候收網啦…Tiger收到皮皮嘅msg。
皮：I want you
皮：to be my partner
皮：come and dance with me(7:29)
你覺得Tiger會點答?
短打暫完!