Chapter Text
Judith：「盧律師，客人陳先生搵你。 」
Anson：「Okay安排佢入3號房，同埋拎晒佢啲樓契文件入嚟。」
Anson已經做咗7年事務律師，每日都係做樓契同埋遺囑。個個以為律師好好搵，包括當年jupas 揀科嘅Anson。 結果，讀得咁辛苦入咗KongU Law，又讀得好辛苦入到PCLL。從一開始憧憬做大律師可以喺庭上雄辯滔滔，到接觸到師兄師姐先知道自己係有幾傻幾天真。
大律師的確只係要實習一年，首先搵實習已經好難，出到嚟好可能十年都開唔到一單。現實嘅種種都驅使Anson腳踏實地去做事務律師，做吓樓契、改名、遺囑、離婚呀咁，起碼需求大啲，搵到錢嘅機會大啲。尤其係佢實習嗰陣就只有呢間local firm 嘅offer。
Anson幫陳生辦好樓契之後，仲親自walk陳生出𨋢口。係呀，而家呢啲咁嘅樓契、遺囑、離婚單都好competitive㗎，間間firm都鬥平，無啲service 都會俾人上網唱衰。
Anson返入房執好嘢就揹住個袋出去，臨出門口擰轉頭同reception 講：「Judith，我出去拎返之前申請做證婚律師嘅文件，晏少少返。」
喺𨋢度嘅Anson回想起嗰日 firm partner Darren同自己講：「Anson你睇吓啲客喺網上面介紹我哋間firm都係話你靚仔㗎！嗱呢個，『幫我搞離婚嗰個律師Anson超靚仔又溫柔。所以我覺得我離婚離得啱。』，仲有呢個『我要搵律師做樓契，best frd話呢間有靚仔，結果上到去，真係好靚仔囉，個人又親切喎！我諗住遲啲去搵佢立遺囑呀，雖然我先35歲。』。所以你快啲去搞個證婚律師啦！我靠你發達㗎喇今次！」
Anson個心裡面諗：「嗰千幾兩千一單，究竟Darren諗住點先夠發達呢？」
喺呢個時候 Anson嘅電話響起WhatsApp notification，係大同group裡面嘅Gladys：「喂！各位我要結婚喇！三個月後呀！有無人有證婚人資格？」
Gladys家境幾好，所以PCLL後就去咗個uncle嘅firm實習，順理成章做咗Barrister。其實佢玩開嗰班人大部分都去咗做bar 或者去咗fund house，好少人好似佢咁落地。
Congrats 咗 Gladys 然後同佢講自己有證婚資格後，就約實咗到時幫佢做證婚律師。Anson就繼續搭車去攞文件。
佢估唔到三個月後Gladys嘅婚宴上，佢會遇到臭名遠播嘅呂大狀。
（完成校對）