Chapter Text
＃１ 不是短尾矮袋鼠
認真討論，我有個自細就識既好朋友，大大話話都已經ＦＤ底左差唔多十幾年。本來佢份人都無咩野，我地其實仲好鬼死夾，如果唔係都無可能相處到咁耐。不過我發現佢把口真係唔收，細細個最多都係串下我做乜成日好似女仔咁著粉紅色衫出街，到後泥大個左就一日到黑嫌棄呢樣又呻戈樣，尤其係最近越泥越嚴重，我就泥去廁所入男廁都好似係錯咁，我想問我係咪應該同佢絕交？
＃２ 朝早要食扭扭粉
巴打，你都話識左十幾年啦，會唔會係你太小題大做咋？
＃３ 巨龍都有胸肌
睇標題以為真係有口臭問題，仲想話介紹Ｘ牌新出戈隻漱口水過你ＦＤ用添。
＃４ 雙層孖芝如果有四塊芝士就好喇
人地樓主都話認真討論啦，樓上標題黨泥嫁？
＃５ 巨龍都有胸肌
我標題黨就直接上圖啦，仲係到同你咁多嗲？
＃６ 七彩雲上的豬仔
樓主有冇多Ｄ事例講出泥等大家幫你分析下啊？十幾年ＦＤ搞到要絕交唔可惜咩？
＃７ 火田華係三個字
做得兄弟就預左一世嫁啦，有咩唔掂咪三口六面拆掂佢囉，唔洗咁嚴重既。
＃８ 巨龍都有胸肌
嗱，說話就唔係咁講啊，俗語有話男人唔係錢就女人嫁啦，樓主講到個ＦＤ咁唔順超佢，係咪踩緊人底線自己唔知咋。
＃９ ＮＦＴ雞脾狗持有人
我都有個成日口沒遮攔既ＦＤ，一個字，忍。
＃１０ 七彩雲上的豬仔
定還是係你太敏感咋，佢會唔會係想同你講笑。
＃１１ 不是短尾矮袋鼠
我都有諗過係咪自己諗多左，但係咪講笑其實真係聽得出。就好似前兩日咁，我地公司附近有間餐廳逢星期五中午都會做特價野，不嬲我地邊個甩身先就會去攞位叫埋野食等對方。咁戈日佢要開會我咪行先囉，等足佢差唔多半個鐘Ｄ餸都攤到涼曬佢先泥，一坐低望左兩眼已經質問我，嗱，要強調真係質問我話見住出面個牌掛住是日精選有咕嚕肉做乜唔叫，然後又話明知佢個會例遲做乜咁快叫餸仲要坐埋係風口位係咪嫌Ｄ野唔夠冰鮮，最賤係佢話我三碗飯擺係到搞到好似人地祭祖咁。
頂佢個肺，佢未泥之前我全程望住三碗白飯無得食都等埋佢，嘩，我都有脾氣嫁，咪唔理佢囉。齋啃完三碗飯我就走左。
利申：我好鍾意食白飯
＃１２ 巨龍都有胸肌
喂，咪住先，女泥嫁？咁難服待既？
＃１３ 朝早要食扭扭粉
打工仔中午為求食個快飯姐，唔通等佢泥到再嗌師傅人齊喇可以上菜咁咩，我都想有個會叫定餸等我既ＦＤ子啊～
＃１４ 火田華係三個字
齋啃飯唔怕削胃咩師兄？
＃１５ 雙層孖芝如果有四塊芝士就好喇
嘩，三碗白飯，我可以食五個雙層孖芝。
＃１６ 不是短尾矮袋鼠
咁我又唔怕削胃，因為白飯真係好好味。同埋點睇都樓上位朋友仔五個孖芝頂胃Ｄ喎。
＃１７ 巨龍都有胸肌
唔洗咁謙喎，一樣咁頂胃。ＳＵＰＥＲ～
＃１８ 老虎
你確定你地係ＦＤ唔係世仇？
＃１９ 七彩雲上的豬仔
祭祖都講得出又真係幾口臭，佩服你仲食得落飯。
＃２０ 不是短尾矮袋鼠
我都有少少後悔做乜無掟佢筷子，然後好型咁走左去，不過無計，真心好餓。返到公司無耐就收到佢ＭＳＧ以為佢認衰仔啦，一睇竟然係張單仲叫我過返一半比佢。佢老味，我除左飯乜都無掂過佢都好意思既，嬲嬲地過左三十蚊算數。條友仲夠膽死話見係糧尾唔同我計，但又叫我記得出糧過返比佢，興到我火屎咁ＳＤ左句食屎啦就無再理佢。
＃２１ ＮＦＴ雞脾狗持有人
我要收返上面個建議，我係你早就揼佢一鑊。
＃２２ 巨龍都有胸肌
條友壇數都幾高喎，難搞難搞。
＃２３ 雙層孖芝如果有四塊芝士就好喇
下～ＡＡ，齋食白飯輸洩曬喇～
＃２４ 火田華係三個字
兄弟間講錢傷感情，比我就型Ｄ，擺低五百蚊係佢枱面然後即刻走。
＃２５ ＮＦＴ雞脾狗持有人
啖氣值五百蚊咩？
＃２６ 火田華係三個字
咩為啖氣啊，係比佢知咩係講心唔講金啊。
＃２７ ＮＦＴ雞脾狗持有人
兄弟有冇興趣投資認養返隻虛擬狗狗，穩賺。
＃２８ 火田華係三個字
呢樣野最近好ＨＩＴ喎，但有冇貓貓嫁，我鍾意貓多Ｄ。
＃２９七彩雲上的豬仔
喂你兩個咪騎劫人地個ＰＯ先得嫁～
＃３０ 巨龍都有胸肌
咪係囉，唔識ＤＭ既咩。
＃３１ 火田華係三個字
ＳＯＲＬＹ ＳＯＲＬＹ，樓主繼續繼續。
＃３２ 不是短尾矮袋鼠
跟住我就成個晏就都無濕過佢，平時扮工我地都會用ＷＥＢ版軟件吹水，戈日我情願玩接龍都唔想同佢講野，捱到放工打完卡準備一個箭步咁跑出去之際，一開門差Ｄ仆街。條友竟然伸腳攔住我，咁我收唔切掣就一野趴左落佢個身到。頂佢話我成舊鉛球咁撞上去佢胸骨差Ｄ碎，要我賠償同佢去食飯。我勁嬲大嗌成肚氣食唔落啊就ＦＩＮＧ開左佢，佢好似終於知衰捉住我手臂話佢請，半推半拉咁帶左我去食燒烤，嘩～成餐飯上火到我差少少爆血管。
＃３３ 雙層孖芝如果有四塊芝士就好喇
嘩～燒烤，講起就想食，最近Ｚ商場開左間韓牛放題聽講款款都係上等空運過泥既靚牛，Ｄ食評吹到Ｄ肉靚到好似初生兒咁。嘖～好想試。
＃３４ 朝早要食扭扭粉
咦～呢間野我知喎，Ｄ甜品都好鬼掂嫁。但間野唔排返個幾兩個鐘都咪洗旨意食到。
＃３５ 巨龍都有胸肌
呢個我有經驗啊，上次同條女排左兩個半鐘，聞煙聞到以為自己要升仙。
＃３６ 不是短尾矮袋鼠
佢就係帶左我去戈間野，丟低一句話要周圍行下買野比阿妹就任我自己一個排隊，都未泥得切發爛渣佢就走左去。其實我都唔明做乜要咁聽話，排左成粒鐘膀胱都就泥爆條友先滋滋悠悠行返泥，問我忍左咁耐會唔會痾唔出仲鬼死咁大聲殊我，如果唔係就泥瀨我真係會打佢。
＃３７ 老虎
好明顯你就係工具人啦，同埋佢都幾幼稚喎。
＃３８ 雙層孖芝如果有四塊芝士就好喇
你就好啦，點姐，間野係咪掂？
＃３９ 火田華係三個字
做乜咁豬兜仔唔打電話叫佢返泥啊。
＃４０ 不是短尾矮袋鼠
你地以為我無咩，打左十狗幾次喇，下下都ＨＥＡ我話揀緊揀緊，好快好快，比Ｄ意志比Ｄ意志，戈刻真係唔知自己做錯左Ｄ咩。
＃４１ 巨龍都有胸肌
嗱，我再問多次，真係唔係女泥既？十足我條女平時濕平Ｄ語氣咁。
＃４２ 雙層孖芝如果有四塊芝士就好喇
諗諗下如果好似傳聞中咁好食既話，我願意奉上我的膀胱。
＃４３ 七彩雲上的豬仔
你都真係好抵得諗喎。
＃４４ 雙層孖芝如果有四塊芝士就好喇
多謝。
＃４５ 七彩雲上的豬仔
唔係你啊，我講樓主啊。
＃４６ 不是短尾矮袋鼠
唉，總之都唔知係自己黑仔定點，放完水返去就咁岩到我地，又比佢乘機串左鑊話我腳頭唔好，佢一排唔洗十分鐘就入得去，真係想問佢個腦係咪入左水。
＃４７ 巨龍都有胸肌
比我直頭開拖啦，仲等咩啊？
＃４８ ＮＦＴ雞脾狗持有人
我唔鼓吹暴力，但佢的確係抵打。
＃４９ 不是短尾矮袋鼠
我都仲未講完，佢持住自己比錢係大佬就兩手ＦＩＮＧ ＦＩＮＧ乜都唔幫手，成程得我拎住個死人鉗係堆煙到反泥反去，燒到我面都熟埋咁制。佢仲要嫌我燒到人地Ｄ靚肉柴曬，一時又話唔夠ＪＵＩＣＹ，再唔係就話生得濟係咪想一齊入廠，我差Ｄ想一野拍佢塊面落個烤網到。
＃５０ 雙層孖芝如果有四塊芝士就好喇
靚牛更係要半生不熟啦，佢識唔識嫁，浪費。
＃５１老虎
我開始懷疑樓主係Ｍ底。
＃５２ 朝早要食扭扭粉
有冇食到甜品啊，士多啤利大福配雪糕好掂個喎。
＃５３ 不是短尾矮袋鼠
無。燒到我成頭煙食乜都碳味，最後走戈陣佢仲嗦左我兩嗦叫我以後食燒烤唔好噴香水，兩隻味溝埋仲怪過榴槤咁話。妖，最好我識預知佢會激嬲我然後又會帶我去食燒烤啦。
＃５４ 蛋白粉再泥多兩桶謝謝
睇左咁耐我有個問題，佢對其他人係咪都係咁嫁？淨係針對你？
＃５５ 七彩雲上的豬仔
係囉，老老實實如果身邊有個咁既人應該真係比人打左好耐嫁喇喎。
＃５６ 不是短尾矮袋鼠
你地咁講佢又真係淨係對我一個先咁口臭，平時對其他人好風趣又好有禮貎，公司Ｄ阿姐仲爭住要介紹囡囡比佢識話要佢做女婿，聽到我反曬白眼，心諗佢個死人款肯定要人地貼埋大床ＵＮＵＮ腳唔洗休先肯制啦，明明就係被住羊皮既仆街狼，懶係搶手咁。
＃５７ 蛋白粉再泥多兩桶謝謝
喂，但咁證明佢真係當你係老死喎，對你先咁坦蕩蕩。
＃５８ ＮＦＴ雞脾狗持有人
我覺得無錯。
＃５９ 巨龍都有胸肌
俗語又話對住越親近既人先越控制唔住自己既負脾氣同怪癖，老友起碼佢應該唔係搵你著數。
＃６０ 火田華係三個字
咦？乜係既咩？點解唔係對住所有人都一樣啊，唔攰嫁？
＃６１ ＮＦＴ雞脾狗持有人
下？你咪咁單純啦，出泥行走江湖有邊個唔係有幾副面孔嫁？
＃６２ 雙層孖芝如果有四塊芝士就好喇
嘖嘖，世途險惡，我都係食多兩個包好過。
＃６３ 七彩雲上的豬仔
話係咁講姐，點親近都要顧下人感受嫁嘛，有時傷害左人都唔知啊。
＃６４ 老虎
咪係囉，仲衰過搵著數，起碼人地都仲會呃呃氹氹讚下你靚仔又剩。
＃６５ 不是短尾矮袋鼠
咪住先，做乜講到我比人呃咁？我淨係煩惱緊應唔應該疏遠佢，再係咁我驚有日我會攞刀劈佢然後上頭條。
＃６６ 火田華係三個字
咁袋鼠仔你自己點諗既先？嗱，我就都係戈句有咩唔岩就講到岩，無謂好似個三姑六婆咁小小野就無左個兄弟吖。
＃６７ 七彩雲上的豬仔
我都覺得你可以試下同佢認真溝通下，同佢表達你真係唔鍾意，睇佢會唔會肯去改。畢竟點ＦＤ都好都要知道大家底線係邊，要識得互相尊重關係先健康又長遠。同埋我覺得你又唔係真係想同佢絕交既，如果唔係你都唔洗煩咁耐啦，既然係ＦＤ更加要開心見誠唔可以收收埋埋。
＃６８ 巨龍都有胸肌
大膽Ｄ！同佢講再係咁口臭就無ＦＤ做。
＃６９ ＮＦＴ雞脾狗持有人
係啦，一於搵佢講清楚。
＃７０ 雙層孖芝如果有四塊芝士就好喇
袋鼠哥哥你加油啊，如果講唔掂數我可以做你朋友嫁，你食到三碗飯我覺得我地應該都好夾。
＃７１ 朝早要食扭扭粉
我都得嫁，你公司邊頭嫁，話唔定我可以做你飯腳喎，唔洗理條頭皮。
＃７２ 巨龍都有胸肌
喂啊漢堡包同扭扭粉你兩條友咪係到搞事啦。
＃７３ 雙層孖芝如果有四塊芝士就好喇
做咩事姐，我想識朋友仔咋嘛。
＃７４ 朝早要食扭扭粉
我想搵飯腳咋嘛。
＃７５ 不是短尾矮袋鼠
多謝你地啊，我會搵佢講清楚嫁喇，豬仔講得岩其實我都唔想無左呢個朋友，所以我唔應該去逃避，唔想我地之間有層隔膜。無論點都好，希望我地唔會炒大鑊啦，我驚谷谷埋埋一次過爆佢個場面會不受控制，應該扯頭髮先定係拍飛佢眼鏡先好？
ＢＴＷ，我唔係短尾矮袋鼠更加唔係袋鼠啊～
＃７６ 火田華係三個字
驚咩丫，男人嘈兩句郁下手就ＦＤ過打ＢＡＮＤ嫁啦。
＃７７ 蛋白粉再泥多兩桶謝謝
文明Ｄ我地，郁Ｄ就喊打喊殺，係抵打先再郁手丫嘛。袋鼠仔你放心喎，我地實撐你嫁。
＃７８ 老虎
加油啊老友。
＃７９ 不是短尾矮袋鼠
好！各位戰友等我返泥啊！
。。。
。。。
。。。
TBC.