Chapter Text
龍龍一直都係姜姜最愛嘅大表哥，今日正正係大表哥生日。姜姜記得之前自己生日，龍龍都會為自己準備禮物同蛋糕。姜姜都想為大表哥做啲乜嘢，但係姜姜無錢買禮物，而且自己個袋嘅小零食都係大表哥俾自己嘅，姜姜無嘢可以送俾龍龍。
好彩花姨姨今日帶咗姜姜去商場，而商場又有姐姐正正派緊啲氣球俾啲小朋友。姜姜就決定要為自己最愛嘅大表哥送上姐姐手上嘅恐龍氣球。
姜姜鬆開花姨姨隻大手，先要跳過小花圃，再跨過商場水池上嘅小橋，最後再要行上小斜坡先去到派氣球嘅姐姐前面條隊度。
姜姜好擔心個唯一一個恐龍氣球會俾其他小朋友拎咗，可幸嘅係前面啲小朋友對恐龍一啲興趣都無。等咗四五個之後，終於到姜姜啦！
「小朋友，你想要邊個氣球啊？」
「龍龍...」姜姜興奮咁指住佢心心諗諗嘅恐龍氣球，佢相信大表哥一定會同自己一樣高興得到呢一份禮物。
但無人話俾姜姜知...其實大表哥今年已經十六歲....
*大表哥視角
Stanley當然知道係自己生日，佢一返到屋企就見到自己嘅小表弟姜濤拉住一隻半浮不沉嘅恐龍氣球咪下咪下咁走埋自己身邊。
「龍龍...」姜濤用小手遞上恐龍氣球嘅拉繩「龍龍～」
由語氣同姜濤嘅笑容中Stanley大概知道應該係呢個三歲唔到嘅小表弟送俾自己嘅禮物。
「嘩～姜姜咁叻，記得大表哥生日啊！」Stanley抱起自己有啲份量嘅小表弟「個氣球俾我㗎？」
姜濤用小手臂抱住大表哥條頸，輕輕係大表哥耳邊「嗯」咗一聲。
「大表哥真係多謝晒你！」Stanley等陣仲約咗啲同學出街玩，俾人見到佢拉住隻咁嘅恐龍應該會俾人笑一世。
就係呢個時間，大表哥感覺到有嘢拉自己褲管。低頭一望，Stanley見到另一個小堂弟一手拎住一個雪芳蛋糕一手拉住自己條褲。
「虎仔又嚟搵堂哥啊？」Stanley知道呢個叫虎仔嘅小堂弟唔多講嘢。
虎仔抬頭望住好高大嘅堂哥點點頭。一向深受呢兩個細路愛戴嘅Stanley早就練出一身好武功，一手抱住一個小朋友絕對唔係問題。最重要嘅係佢兩個一肥一瘦，所以抱起上嚟都算奇怪的平衡。
當虎仔同stanley水平對望嘅時候，虎仔遞出自己手上嘅雪芳蛋糕，細細聲係Stanley耳邊度講「巨龍哥哥...生日快樂！」
呢一聲生日快樂真甜到Stanley心入面，大家要知佢呢一個小堂弟不嬲都唔太出聲，一講就講晒成句實屬難得。
除咗自己感動之外，Stanley都有留意自己手上嘅兩個細路。佢發現姜濤望實咗虎仔手上嘅蛋糕，而虎仔又偷偷望住姜濤手上嘅氣球。
「姜姜，你幫大表哥收咗虎仔嘅蛋糕。虎仔又幫巨龍哥哥拎住姜姜個氣球好唔好啊？」
就係咁，走嘅時候虎仔就帶走咗小恐龍。姜濤又坐係大表哥大脾度食咗個雪芳蛋糕，而Stanley就乜都唔駛拎咁同啲同學出街去玩。
所有人係大表哥生日都好愉快。
Fin❤️
*有人問大表哥反應就出埋少少
*靜靜放埋老虎入去
*龍誕小賀文
星期六八點鐘， 姜濤就準時係大表哥家出現，因為姜濤父母都要返工，所以星期六會拎姜濤去大表哥屋企暫托，當然中學生Stanley一向無咁早起身。
姜濤爬上大表哥張床度，成個人壓係大表哥身上「龍龍...舞舞…」一朝早姜濤就想睇大表哥跳舞。咁都解釋咗點解大表哥咁錫姜濤，姜濤係大表哥五音不全，跳舞又甩晒拍嘅時候已經係佢最佳觀眾， 姜濤永遠都會係大表哥表演完之後俾最大嘅掌聲同鼓勵。所以大表哥先會一直學跳舞同唱歌，當然後來大表哥嘅觀眾群中加入埋虎仔啦。
「俾大表哥瞓多一陣好唔好？」Stanley尋日先同同學打機打到今朝兩點。大表哥一個轉身就將攬姜濤入被竇，輕輕咁拍姜濤個背脊。
姜濤都好習慣大表哥要瞓多一陣，所以佢會安靜咁係大表哥懷中數下手指。
直到細邱生嘅出現，大家見姜姜同虎仔好似係Stanley生日當天好和諧，但其實佢倆個一直暗暗地爭寵。講真，係虎仔一直爭寵先真，就好似其實虎仔平時無咁鍾意扭人抱，但每次見到堂哥抱住嗰個同自己同年嘅姜濤時，虎仔就會行埋堂哥身邊扭抱。
又或者虎仔唔算好食零食，但只要堂哥餵緊姜濤，虎仔就自然咁去分一杯羹。久而久之，Stanley身邊總係圍繞住呢兩個小朋友。佢哋要食一齊食，要抱一齊抱，就算瞓都一齊瞓。
星期六虎仔都會係Stanley家暫托，反正一個又係睇，兩個都係睇。「巨龍哥哥早！」虎仔探頭入Stanley間房，唔知幾時開始虎仔會自動波咁去Stanley間房度搵自己堂哥去玩。
「Sh…」係大表哥被窩中嘅姜濤將自己嘅小肥手指攔係自己個咀度示意虎仔安靜。當虎仔見到姜濤係堂哥床上，就忍唔住爬上巨龍哥哥張床瞓係堂哥另一邊。虎仔覺得個堂哥係自己㗎，佢唔俾姜濤一個獨估。
床上咁多動靜，Stanley當然要擘大眼睇一睇。佢只見身邊除咗小表弟之外，仲有小堂弟係度，半夢半醒嘅Stanley好習慣咁攬埋虎仔，拍住背希望虎仔都瞓多一陣。
所以到邱媽媽入去睇下嗰兩個細搞緊乜嘢嗰時，佢只見自己個仔張床上面，一大兩小睡得香甜。邱媽媽忍唔住偷拍咗一張再傳到各自嘅父母度，等佢哋知道嗰幾個細嘅相處有幾融洽。
#虎濤龍