Chapter Text
說到現今最當紅的香港男子組合，必定非MIRROR莫屬，12子各有風格和優點，不過最讓盧瀚霆陷入深淵的，就是那個多才多藝，既擅彈琴又能搞笑的港大畢業生呂爵安。
「其實你鍾意佢啲乜啫……你知唔知佢成日喺被竇放屁再逼我聞㗎，勁賤格囉！」一位染上啡色頭髮，眼大鼻高，跟呂爵安有幾分相似的女生說。
「幾搞笑啊……我覺得佢好可愛喎。」盧瀚霆看著手上的呂爵安親簽相片甜笑著。
「黐線……黐線㗎你哋班爵屎！」女生反著白眼，盧瀚霆看到又失笑，太像呂爵安了。
「唔好嬲啦，見你幫我拎到全球唯一一張呂爵安瞓覺親簽相，今餐我請！」
「你知唔知我囈咗佢幾耐先肯幫我啊？我唔理啊，兩餐。」
「得啦，幾多餐都得，如果之後可以影到更多絕密相嘅話……」
女生深呼吸一下，心裡想著：「點解呢個世界會有人鍾意我阿哥㗎……你哋知唔知佢喺屋企個樣，同你哋見到嘅係180度反轉……」
「你記得呢張相唔好post上網啊，自己keep好喇。」
「知喇長氣，你講咗好多次喇！」
5年前中六DSE畢業後，盧瀚霆便於一間中小企擔任文職工作數年，不過一向坐不定的他略嫌工作重覆又沉悶，所以早在大半年前開始計劃裸辭兼進修，後來將數年儲來的錢，加上媽媽補貼少許學費，成功入讀港大……旗下的副學士學位。
在班上他已是高齡學生，不過跟同學相處也沒有太大問題，畢竟盧瀚霆天生是交際能手，面對誰都總能「吹幾句」，加上班上也有跟自己差不多經歷，比自己大1年的老死李駿傑。
盧瀚霆每日上學，聽得最多的是：「小如豬，可唔可以幫我拎你阿哥簽名啊？」、「小如，可唔可以叫你阿哥錄句音畀我啊？」、「小如，我3個月後生日啊，可唔可以同你阿哥食餐飯啊？」、「小如啊，可唔可以……」
不只呂小如感到煩厭，就連盧瀚霆和李駿傑都被這些「可唔可以」弄得頭昏腦漲。
至於為何呂小如會幫盧瀚霆取得呂爵安絕密睡覺相暨簽名，原因非常簡單，就是同樣作為爵屎的盧瀚霆比較理性，不會每日主動處處威逼呂小如之餘，當呂小如送上禮物時也會懂得交還人情，就例如上述提到的請食飯一樣。果然人有數年工作經驗，就不會像那堆乳臭未乾的屁孩一樣，只懂飯來張口。
互惠互利，呂爵安不會少了一忽肉，盧瀚霆又開心，呂小如的胃又滿足，何樂而不為？
兩人離開西餐廳後，呂小如往小巴站方向走，盧瀚霆則放棄日常乘搭的巴士，改為乘坐地鐵，目的是可以更快回家，將剛到手新鮮滾熱焫的親簽相好好收藏，因為愈逗留街上多1秒就會多1秒丟失的機會。
未夠20分鐘盧瀚霆已經回到家裡，衝入睡房、開啟暖黃色枱燈，再拉開電腦桌的一個櫃子，取出一本灰色皮面相簿。
翻開相簿，裡面全是呂爵安的照片和周邊，從《造星》到《過時過節》，即使是一個廣告、一首歌曲、一齣戲，都至少會有一件應援手幅。
盧瀚霆小心翼翼將親簽相放到相簿其中一頁，再在透明封套上於呂爵安睡熟中的臉龐用marker畫上1個心心，可愛度又添幾分。
[小如：我返到屋企喇，你返到未啊？] （21:58）
[AL：👍🏻，返到一陣喇] (21:58)
[小如：你今個禮拜六晚得唔得閒啊？] (21:59)
[AL：😍咁快又有禮物？今次又想食我幾多錢啊？](22:00)
[小如：😒乜你咁諗我㗎 ？仲諗住俾機會你了解多啲我阿哥添，唉，冇喇你當我冇講過啦😌](22:01)
[AL：！！！！！](22:01)
[AL：！！！！！你講多次！！！](22:01)
[小如：😔冇喇，心都淡](22:01)
[AL：一餐飯！$200 budget ](22:01)
[小如：deal🤩](22:02)
[小如：我阿爸阿媽啱啱話今個禮拜六日過澳門玩，所以屋企冇人，諗住叫你同Jeremy上嚟打邊邊啊🍲](22:02)
[AL傳來了一則語音訊息]
「啊！！！真心咩？真係上你屋企喎！會唔會唔係咁方便啊？話晒你阿哥係大明星……啊！！！好開心啊！！！」
[小如：使唔使咁激動啊，我耳膜穿喇😖佢呢排好忙，冇凌晨都唔返屋企㗎喇](22:03)
[AL：我即刻打畀Jeremy！！！](22:03)
[小如：約5點啦，喺我樓下街市一齊買嘢上去，搞得嚟差唔多7點開餐OK？](22:03)
[AL：好！你話咩就咩！！！到時我係咪可以參觀你阿哥間房👉🏻👈🏻？](23:03)
[小如：叫得你上嚟，你話呢？](22:03)
[AL：😱😱😱😱😱😱😱你咁好可以點樣報答你？😭](22:04)
[小如：唔使整咁多花臣喇😒我沖涼先，再傾～](22:04)
[AL：小人先行告退，娘娘請慢行🙇🏻♂️](22:04)
對盧瀚霆而言，裸辭是23年人生裡做得最正確的選擇，因為這樣才能重返校園，在機緣巧合的情況下認識了呂小如，然後造就了今個週末可以一到愛人……咳咳……呂爵安長大的地方。
試問世上有多少個粉絲可以有這個福利？
TBC