Work Text:
是咁的，小弟喺某個藝術氣息好重同好多homo 嘅industry 到撈咗幾年，識到個好close 嘅同事仲做埋frd，佢就係叫Jeremy。咁幾年嚟兄弟之間我串下你，你串下我都冇咩問題，但我呢排好似搞到啲嘢返唔到轉頭⋯⋯
我最近就察覺到Jeremy 有個習慣——佢好鍾意坐坐下將隻手夾喺兩隻大髀中間。大佬，男人老狗咁坐法唔會哽住自己嘅咩？？不過經過七七四十九日嘅運算後，終於俾自己諗到個理由——人哋根本就冇俾包嘢哽到，所以完全冇feel。⋯⋯。。。睇落又唔係啊，話晒我哋都肉帛相見過（更衣室有著底衫，非gay ok？），矛可能嘅～ 其他人見到都可能唔敢問，但爵爺我就夠薑嘞⋯點解？因為我係佢好兄弟囉？難得俾me 摷到個咁搞笑嘅習慣，今鋪唔玩下佢都過唔到癮。
話晒今日又咁橋，做完嘢其他兄弟同staff 都走晒剩返Jeremy 同我喺Studio hea 緊，咁我就梗係承男而上啦——
「喂 Jeremy」
「中路！！中路缺人！！」
「⋯⋯」
再咁落去都唔係路，睇怕等佢end game 得嚟我都走咗一百世
「⋯⋯喂 我有嘢想問你」
「吓 有咩咁急住問阻住我打機啊 唔係重要嘢嘅話我跌分入你數」
睇嚟Jeremy 都有啲良心會理我多過佢部掌上情人，竟然肯放低部機。我突登扮晒嘢咁挨埋去佢嗰到先開口問：
「你⋯⋯點解成日咁鍾意坐坐下擺隻手插喺大髀中間嘅？唔會唔舒服嘅咩？你中間有抽嘢㗎？」
「⋯⋯因為⋯⋯因為有安全感啩？我都唔知喎，咩問題嚟，無啦啦咁問⋯」
哦。原來佢自己都唔知，fine。不過答案對我嚟講唔係最重要，一開始已經係醉翁之意不在酒。
Jeremy 耷低咗個頭，搞到我睇唔清楚佢個樣。但我呢刻100%肯定佢係面紅緊，因為呢條友面皮薄到死，一早估到佢啦～A0（.5）仔～有時咁樣玩下佢都真係幾得意，我決定食住個勢，一於攬住佢膊頭，壓低把聲喺佢耳仔邊爆個大技，惹佢發下老脾——
「咁⋯我⋯可唔可以都插你中間？用⋯」
我嘢都未講完，Jeremy 就一嘢擰轉頭𥄫住我，粒聲都唔吱下，對眼又擘到勁大；然後由頭紅到落頸變到成隻燒豬咁，對手仲係咁捽係咁捽係咁捽⋯⋯
Stop STop STOp STOP STOP！！！
屌！我玩大咗？？喂做咗幾年兄弟而家先嚟玩出火？？？吾系甘牙？？？？
「啊哈哈哈哈哈 我講下笑啫 It’s just a joke！」
我走夾唔唞咁彈開，舉高雙手表示蘑菇，然後嗱嗱臨執嘢走人。對唔住啊J 先生，我唔係有心flirt 完人就走㗎？！講笑咋嘛！講笑咋嘛？！
狗衝上到Uber ，我先醒起自己本身係講好咗同Jeremy 一齊搭車返去，而家就咁抌低咗人就走咗佬，搞到自己好似做錯咗啲咩要坐洗頭艇咁款。臨走前，我眼尾睄咗佢一眼，好似見到佢攤坐咗喺地下到係咁用手抹自己塊面。但今晚嘅情況實在係有啲複雜搞到我理唔切佢，而家好混亂。
所以我想問下各位巴打，嚟緊應該點部署好？