Chapter Text
個日好似係星期四，江𤒹生都唔係好肯定。佢淨係記得個日佢同平時一樣，經海傍個條路行去做嘢個間pub。行咗無耐，佢聽到有人係到busking，就不由自主停低咗。
今日呢個busker佢好似未聽過，把聲好清脆柔和，聽落令人好舒服。佢行過去拎起銀包諗住比錢啦，點知個人咩都無放出嚟，連個結他袋都閂埋咗，又無擺個ig名出嚟。江𤒹生心諗呢個人咁奇怪嘅，點知抬頭就見到個busker眼甘甘望住佢。
個人明明生得幾肆正，皮膚白白淨淨咁，對內雙眼皮令佢望落去成個人好乖，應該大學生嚟。但佢黑住面咁啤實佢，令江𤒹生打咗個突，心諗唱歌咁溫柔個人咁惡死嘅。佢本身仲諗住問佢攞 ig follow支持下，最後都係打消咗呢個念頭，轉身行返去開工算。
本身佢都無擺係個心到，但個晚唔知過咗幾耐，佢又見返佢。個時佢一入間pub江𤒹生就注意到佢，因為佢孭住把結他個斯文樣真係好突出。佢好似有啲迷茫咁左右望下，之後就坐咗係江𤒹生做緊嘅吧台到。佢猶豫咗兩秒，之後就話要杯啤酒。
「係！一杯啤酒，嚟緊！」江𤒹生一如既往爽快咁應。今日唔算好忙，又有幾個熟客仔嚟飲野搵佢吹水，所以佢心情都幾好。佢一面斟啤酒，一面係度諗呢條友做咩咁熟口熟面，但睇佢個樣又唔似熟客嚟喎，通常嚟多幾次佢都認得嘅。終於係佢遞杯酒俾佢個時，突然間醒起，「係喎！你咪頭先係出面唱歌個busker？」
個人頓咗一秒，之後接過咗杯酒，「係啊。」
「之前無見過你嘅？你第一次嚟㗎？」
「嗯。」
「你做咩唔拎個兜嚟啊？你唱得咁好聽實大把人比錢你啊。擠個ig名出黎都好啊，包保你一晚多幾千個follower啊。」
個人唔出聲望住佢，之後舉起杯酒係咁飲。江𤒹生見佢唔應就戚一戚膀就無再理佢，雖然佢好中意同客仔吹水，但周不時都有人一個人嚟飲悶酒嘅，佢都見慣見熟㗎啦，所以都無乜在意。
收尾個陣佢係到洗緊杯，花姐突然間係佢身後大叫：「喂江𤒹生你同我搞掂佢啊！」
佢一轉身，先發現啲客雖然走哂，但仲有條友趴咗係佢前面嘅吧枱到。
「你有無睇住佢㗎？我講過幾多次唔好比啲客仔斷片，我哋依間pub黎㗎，唔係club！陣間啲人醉酒鬧事點算？」
「吓？佢叫咗杯啤酒咋喎，我點知佢咁都斷片㗎姐。況且人地都無搞事。」
「我唔理呀，佢係你個枱嘅客仔，你同我call的士抬走佢！」
「唉。」老細叫到，佢惟有認命放低啲杯將條友抬起。佢哋行咗幾步，江𤒹生就忍唔住話：「嘩乜你望落咁瘦，原來都唔輕㗎喎。喂你孭好啲部結他先，有咩依郁我唔負責㗎。」
「⋯⋯你好嘈。」
「搞錯呀我好心幫你截的士仲咁話我。你住邊呀？」
「⋯⋯」
「喂？你唔講司機點送你返去呀？喂？醒下啦？」
呢個時候的士司機已經停好車係佢哋前面，江𤒹生只能怪自己衰心急未問到地址就yap咗個司機埋嚟。佢將條友連結他塞入去的士後座，然後自己坐埋入去。為咗唔好再咪摩比的士大佬屌，佢脫口而出講咗自己屋企地址。
架車開咗之後，佢feel到司機有啲擔心咁係倒後鏡到睄佢哋，唔使諗都知係怕佢係架車到嘔啦。江𤒹生於是拍下條友個背脊，等佢可以舒服啲，「喂，你叫咩名呀？」
「⋯⋯陳。」
「陳咩呀？喂？咁唔飲得就咪飲啦唉！到啦陳仔！落車啦我哋！」
抬緊條友返屋企嘅江𤒹生，仲未睇到佢老細瘋狂炸佢嘅message：「喂死仔你死咗去邊？未收完檔㗎喎你！」