Chapter Text
呂爵安每日最enjoy嘅時間係六點之後，因為呢個時候嘅studio終於得返佢一個——Ian中意早返早走，避開塞車時間自由自在咁揸車；AK通常三四點就嘈住話要去街市買餸，唔係咩都比人買哂；Tiger就日日六點未夠比佢趕走（「後生細仔扮乜老屎忽鬥遲走呀」）。
呢個時候佢終於可以塞住對耳仔，一邊聽歌一邊做嘢，效率其實仲高過日頭。呢日佢研究緊份quotation個陣，電話突然響——佢抬頭望一望電腦個時間，已經成夜晚九點幾。
「喂？Hello，係咪Edan呀？我係阿Jer呀。」
呂爵安有啲surprise佢會直接打比自己，「哦，狂人Jer。有咩幫到你呀？」
柳應廷怕怕醜醜咁笑，「無呀，你咪同我經理人寶姐傾咗嚟緊個show嘅rundown嘅，我係Lokman之後、Ian之前出場？」
「係呀，Lokman淨係唱一首，所以個show一開始你都要ready好。」
「Lokman係唱虎道門？我可摸以——問吓Ian個歌單夾返個flow？佢應該唱ballad多？」
「睇吓先——」呂爵安係iPad到㩒返Ian send比佢個message出嚟，「I took a pill in Ibiza、留一天同紅塵客棧。」
「佢淨係唱一首自己歌？我仲好期待聽佢個首搞不懂live⋯⋯」
「佢話唔想搶咗Kyubi風頭喎。始終我地搞show都係想要gimmick，陣間啲頭條全部都係網絡歌手Ian Chan首唱live咁搞唔掂⋯」
「都係嘅⋯⋯咁我係要由虎道門炸場，過渡去Ian嘅ballad，但我又唔想順序唱哂三部曲咁悶⋯⋯第一首承接Lokman就應該要狂人或者mm7，之後可以唱水刑同迴光物語？你覺得夾唔夾到？」
呂爵安完全無諗過呢個問題，佢淨係掛住諗點樣度到個rundown夠時間比啲model換衫、場地佈置、請啲咩人嚟睇、搲sponsor、係邊到落廣告、搞抽獎、請化妝師髮型師燈光師⋯⋯
佢以為自己已經諗得好周全，但好明顯都係唔夠呢位新晉偶像對自己嘅演出咁上心。
仲要今次柳應廷根本一蚊都無收過。
但呂爵安把口都係講唔出咩好說話，「點解唔唱哂狂人同mm7兩首呀，柳炒會覺得好mm7㗎喎。」
「痴撚線，你想我斷氣定係個檯到暈低呀。」
「哦，阿Jer講粗口，乜依家啲偶像咁都有嘅——」
「對住咩人咪講咩話囉。」
「吓？我斯文人嚟，聽到粗口會打冷震㗎喎。」
「聽到你呢句我就真係打冷震啦。」
兩個人你來我往打鬧咗一陣，柳應廷突然諗起啲嘢話鋒一轉，「係喎，我上檯個陣呢，個燈光可摸以——」
佢一輪嘴講咗一堆佢想要嘅效果，呂爵安好認真咁mark低哂，但聽到一半都係忍唔住打斷佢，「阿Jer哥，呢啲點做呀，違反自然物理定律喎？」
「屌你啦，係咪你唔夠料咋，我直接搵監製好過。」
「咁你慳返都得嘞，我聽講個producer比Lokman屌到上天，話佢啲sound engineering求求其，搞到依家Ian要邊學邊自己跟返。聽日我將個啲真係做到嘅pass比佢啦。」
柳應廷忍唔住笑，「全行應該得文哥夠膽屌監製，佢出名要求高。」
「但佢啲表演次次都好正㗎喎，我都好期待佢個日炸爆哂個場。」
「文哥佢——啊，」柳應廷突然望到個時間，發現原來兩個人已經講咗個幾兩個鐘，「我無為意依家咁夜添，唔講啦我聽日call早瞓過籠實比人鬧。你有咩直接打比我啦，搵唔到我都可以搵寶姐。」
「咁好啦。我等住睇你表演係個檯到暈低㗎啦，唔好令我失望呀。」
「暈你個頭！」
柳應廷係一片不懷好意嘅笑聲之中cut咗佢線，然後一嘢攤咗落床到，好快就瞓著咗。